BE 363 - MAULIATE DOK HAMUNA

VERSE 1

Mauliate dok hamuna, di Debata na basar i

Sai puji ma denggan basaNa, na so marpansohotan i

O Israel girgir endehon, ma asi ni rohaNa i

Na so hea marparujungan, saleleng ni lelengna i.

VERSE 2

Hamu pinompar ni si Aron, gogo ma hatindangkon i

Dok ma: Saleleng ni lelengna, do asi ni rohaNa i

Hamu pe, na mangkabiari Jahowa Debatanta i

Sai dok imbaru ganup ari, do asi ni rohaNa i.

VERSE 3

Ai uju au di hagogotan, joujou do au tu Debata

Tangiangki do ditangihon, dibaen do hosangki arga

Jahowa do tongtong donganku, beasa ma mabiar au?

Tung aha baenon ni alongku, nang manang ise dompak au?

VERSE 4

Tuhanku do na manguluhon, sude na mangurupi au

Dibahen i ma hutaluhon, luhut na mangkosomi au

Dumenggan do marhaporusan, tu Debata na sintong i

Asa tu jolma marhaposan, nang pe tu na rumaja i.

VERSE 5

Parbegu do mangkaliangi, au on mambuat hosangki

Hape sude do hutanggoi, marhitehite Tuhanki

Ibana do do hupangasahon, i do umbaen malua au

Ibana do na niarahon, umbaen marantu monang au.

VERSE 6

Sobokkon loba na marsorop, dihaliangi musu au

Hape laos songon api mintop, di bulu duri do i lao

Marhite goar ni Tuhanku, do hutaluhon sasude

Au na tinggang naeng bahenonna, ditungkol Debata dope.

VERSE 7

Jahowa do hagogoonku, endengku las ni rohangki

Ibana do hatuaonku, na margogoihon tondingki

Marolopolop do luhutna, partigor di jabuna be

SiamunMi do o Jahowa, pamonang naposoM sude.

VERSE 8

Timbul do tangan ni Jahowa, sibahen hamonangan i

Na tunduk do na jungkat roha, hot jongjong do partigor i

Ndang mate au, sai na mangolu, do au marhite Tuhanki

Pajojoronku, o Pangolu, ma saluhut pambaenanMi.

VERSE 9

Tutu, gogo do dipinsangi Jahowa au, alai laos tong

So mate au, ai disondangi, denggan basaNa au tongtong

Sai ungkap bahal hatigoran, di au, ai naeng do au tusi

Lao mangalehon hasangapon, di Sipalua tondingki.

VERSE 10

Dison do bahal ni Jahowa, bongotan ni partigor i

Lao pasangaphon Debatana, di serep ni rohana i

Mauliate ma rohangku, di Ho na asi roha i

Na mangalusi tangiangku, mambahen hatuaonki.

VERSE 11

Ianggo batu binolongkon, ni angka pande bagas i

Jahowa do na pajongjongkon, baen batu na di suhi i

Na pinatupa ni Jahowa, do i na longang situtu

Do roha ni na marnidasa, huhut marsomba be burju.

VERSE 12

Nuaeng ma ari na dumenggan, binaen ni Debatanta i

Dibahen i ma tapadenggan, nuaeng parendeonta i

Tumpahi hami ale Tuhan, di ari las ni roha on.

Sai pasupasu ma pambaenan, ni tangannami be tongtong

VERSE 13

Pinasupasu ma Rajanta, na ro marhite goar ni

Jahowa Tuhan Debatanta, tu hita huriaNa i

Jahowa, Sidongani hita, do Debata na sintong i

Antong, tambathon peleanna, tu tanduk ni langgatan i.

VERSE 14

Ho, Debatangku, pujionku, patimbulonku sai tongtong

Mauliate ma rohangku, di Ho dibaen basaM inon

Hamu sude pe, ale dongan, dok ma mauliate i

Ai ndang hea marpansohotan, do denggan ni basaNa i.

Share this post