BE 300 - TAPUJI MA TUHANTA

VERSE 1

Sai hehe ma rohangku, mamuji Debatamu

Na sai marasi roha, di nasa manisia.

VERSE 2

Ai di na modom ahu, sai dijagai do ahu

Aut unang i naung mago, do au dibaen pangago

VERSE 3

Didok Ho, o Tuhanku, pos ma roham anakKu

Sai sonang ma ho modom, lao do muse na holom

VERSE 4

Naung saut hataM, o Tuhan Huida hatiuran

Ndang na mahua ahu, dijaga Ho do ahu

VERSE 5

Tung aha ma pelean, las ni rohaM hulehon?

Endengku tangiangku, i ma pelehononku

VERSE 6

Ndang i tulakkononMu, diida Ho rohangku

Diboto Ho, o Tuhan, soada na dumenggan.

VERSE 7

Sai udut pinungkaMu, sai surusuruanMu

Manjaga au arian, asi rohaM o Tuhan.

VERSE 8

Urupi au mangula, ulaon na marguna

Bonana nang ujungna, Ho ma mambaen jadina.

VERSE 9

Patiur ma langkangku, ingani ma rohangku

HataM hangoluanku, di dalan tu lambungMu.

Share this post